Chandni Chowk : चांदणी चौकात अडकला मुख्यमंत्र्यांचा ताफा; स्थानिकांची समस्या पाहून अधिकाऱ्यांना तातडीचे आदेश
एमपीसी न्यूज : पुण्यामध्ये चांदणी चौकात (Chandni Chowk) नेहमीच ट्रॅफिक असते. त्यामुळे स्थानिकांना आणि वाहनचालकांना त्रास सहन करावा लागतो. शुक्रवारी रात्री या वाहतूक कोंडीचा फटका खुद्द मुख्यमंत्री एकनाथ शिंदे यांना बसला. त्यांचा ताफा वाहतूककोंडीमध्ये अडकला. आणि त्याच वेळी स्थानिकांनी देखील या वाहतूक कोंडीची तक्रार मुख्यमंत्र्यांकडे केली. स्थानिकांनी शिंदेंकडे तक्रार केल्यानंतर तातडीने त्यांनी या तक्रारीची दखल घेतली.
Traffic rules: चांदणी चौकातील वाहतूक कोंडीवर तोडगा, नवीन वाहतूक नियम जारी
या वाहतूक कोंडीचा प्रश्न विधान सभेत देखील मांडण्यात आला होता. तसेच, यावर उपाय म्हणून शुक्रवारी चांदणी चौकात वाहतुकीचे नियम देखील लागू झाले आहेत. पिंपरी-चिंचवडचे वाहतूक शाखेचे पोलीस उप आयुक्त आनंद भोईटे यांनी वाहतूक नियमनाचे नवीन आदेश निर्गामित (Chandni Chowk) केले असून हे आदेश प्रायोगिक तत्वावर 26 ऑगस्ट पासून लागू होणार आहेत.
मुख्यमंत्री शिंदे यांनी स्थानिकांची तक्रार लक्षात घेता लगेच अधिकाऱ्यांना फोन केला. आणि आज सकाळी साडेआठ वाजता पिंपरी-चिंचवडचे वाहतूक शाखेचे पोलीस उप आयुक्त आनंद भोईटे यांना स्पॉटवर भेट द्या असे आदेश दिले. एक ट्रक बंद पडल्याने वाहतूक कोंडी झाल्याचे समोर आले आहे. येथील वाहतूक कोंडीचे गांभीर्य लक्षात घेऊन मुख्यमंत्री एकनाथ शिंदे यांनी याप्रकरणी तातडीने आढावा बैठक घेण्याचे आदेश दिले आहे. उच्च व तंत्र शिक्षण मंत्री चंद्रकांत पाटील हे स्वतः अधिकाऱ्यांची बैठक घेणार असल्याचे सांगण्यात आले आहे.
