Pimpri : पुणे- मुंबई द्रुतगती मार्गावरील वाहतूक गुरुवारी दोन तास बंद राहणार
एमपीसी न्यूज- पुणे- मुंबई द्रुतगती मार्गावरील मुंबईहून पुण्याकडे जाणारा मार्ग गुरुवारी दुपारी बारा ते दोन वाजेपर्यंत बंद ठेवण्यात येईल, असे महामार्ग वाहतूक पोलिसांनी कळविले आहे.
पुणे- मुंबई द्रुतगती मार्गावर पुण्याच्या दिशेने येणाऱ्या मार्गावर खालापूर टोलनाक्याच्या आधी महाराष्ट्र राज्य रस्ते सुधारणा महामंडळ लिमिटेडतर्फे ओव्हरहेड गॅन्ट्री बसविण्याचे काम हाती घेण्यात येणार आहे. यासाठी दोन तास वाहतूक बंद ठेवण्यात येणार असून या दरम्यान पर्यायी मार्ग म्हणून शेडुंग फाटा येथून वाहतूक जुन्या पुणे- मुंबई मार्गावर वळविण्यात येणार आहे. वाहनचालकांनी या पर्यायी मार्गाचा वापर करावा. या कालावधीत अवजड मालवाहू वाहनांना थांबवून ठेवण्यात येईल. त्यामुळे अवजड वाहनचालकांनी आधीच नियोजन करावे, जेणेकरून वाहतूक कोंडी होणार नाही, असे आवाहन महामार्ग वाहतूक पोलिसांनी केले आहे.
