Pune Metro : रिटर्न तिकीट बंद केल्यानंतर मेट्रोकडून एक दिवसाच्या पासची सुविधा सुरु
प्रवाशांना तिकिटासाठी मेट्रोकडून काउंटर तिकीट, व्हाटसअप तिकीट, एटीव्हीएम तिकीट, मेट्रो अॅप असे विविध पर्याय दिले आहेत. तसेच यामध्ये प्रवाशांना रिटर्न तिकीट देखील काढता येत होते. मात्र मेट्रोकडून हा रिटर्न तिकिटाचा पर्याय 1 मार्च पासून बंद करण्यात आला. आता प्रवाशांना दोन्ही मार्गावर प्रवास करताना प्रत्येक वेळी तिकीट काढावे लागत आहे.
महामेट्रोकडून पिंपरी-चिंचवड महापालिका (PCMC Metro Station) ते जिल्हा न्यायालय (Civil Court Metro Station) आणि वनाज (Vanaz Metro Station) ते रामवाडी (Ramwadi Metro Station) या दोन मार्गांवर मेट्रो सुरु झाली आहे. आता जिल्हा न्यायालय ते स्वारगेट (Swargate Metro Station) हा टप्पा सुरु होणे बाकी आहे. पुढील काही महिन्यात हा मार्ग देखील प्रवासासाठी खुला होणार आहे.
पुणे आणि पिंपरी-चिंचवड या दोन शहरांना जोडणाऱ्या प्रमुख सार्वजनिक वाहतूक सेवांमध्ये मेट्रो चांगला पर्याय म्हणून समोर आली आहे. वाहतूक कोंडीतून सुटका करत हजारो नागरिक दोन्ही शहरादरम्यान प्रवास करीत आहेत. मेट्रोने रिटर्न तिकीट सेवा बंद करून एक दिवसाच्या पासची (One Day Pass)सेवा सुरु केली आहे. 100 रुपयांमध्ये दिवसभर मेट्रोने प्रवास करता येणार आहे.