Pune News : कोविड काळात केलेल्या कामांचे होणार ऑडिट

 कोरोनाचा संसर्ग सुरू झाल्यानंतर कोरोनावरील औषध उपचारापासून क्वारंटाईन सेंटर, रुग्णालयाची उभारणी, विस्थापीत मजुरांसाठी कॅम्प, लॉकडाउनपासून रुग्ण व विस्थापितांची भोजन व्यवस्था, स्वाब सेंटर्सची उभारणी, लसीकरण केंद्रांची उभारणी, स्मशानभूमीचे अद्ययावतीकरण, सुरक्षिततेसाठी सीसीटीव्ही यंत्रणांपासून अनेक वस्तुंची खरेदी तसेच कामे करण्यात आली. आपत्ती व्यवस्थापन कायद्यानुसार तसेच स्थायी समितीनेही यासंदर्भातील सर्व अधिकार महापालिका आयुक्तांना दिले होते. त्यानुसार प्रशासनाने ६७ (३) नुसार कामे व खरेदी केली. तसेच यासंदर्भातील प्रस्तावही नंतर मान्यतेसाठी स्थायी समितीपुढे ठेवले होते. या कामांमध्ये अफरातफर झाल्याची शक्यता व्यक्त करत या कामावरून आणि त्याच्या बिलावरून नगरसेवकांनी नाराजी व्यक्त करत चौकशीची मागणी केली होती. मात्र प्रशासनाने तेव्हा कुठला निर्णय घेतला नव्हता. मात्र आता या सगळ्या बिलांचे ऑडिट करण्याचा निर्णय घेण्यात आला आहे.