Supriya Sule : आम्हाला काहीही लपवण्याची गरजच नाही; रोहित पवारांच्या प्रश्नावर सुप्रिया सुळे यांचे उत्तर

सुप्रिया सुळे म्हणाल्या, अद्याप तरी रोहित पवार यांची कोणतीही चौकशी सुरू झालेली नाही. फक्त माध्यमातूनच अशा प्रकारच्या बातम्या सुरू आहेत. मी रोहित पवार यांच्याशी बोलले आहे. त्यांना अद्याप नोटीस आली नाही. मात्र, आमच्यापैकी कोणालाही नोटीस आली तर आमची भूमिका नेहमीच सहकार्याची राहिलेली आहे. माझा न्यायव्यवस्थेवर पूर्ण विश्वास आहे. त्यामुळे आम्हाला काहीही लपवण्याची गरज नाही. चौकशी झाली तर आम्ही त्याला सामोरे जाऊ आणि उत्तर देऊ असे सुप्रिया सुळे म्हणाल्या.

मनसेकडून वसंत मोरे यांना बारामती लोकसभा मतदारसंघाची जबाबदारी देण्यात आली. त्याविषयी विचारले असता सुप्रिया सुळे म्हणाल्या, मनसेने देखील त्यांच्या पक्षाचा प्रचार करावा. आम्हाला काहीच अडचण नाही. माझ्या मतदारसंघावर माझे प्रचंड प्रेम आहे. त्यामुळे जो लोकप्रतिनिधी या मतदार संघाला पुढे घेऊन जाईल त्याला न्याय मिळालाच पाहिजे. याशिवाय बारामती सगळ्यांनाच हवीहवीशी वाटते हे याचेच प्रमाणपत्र असल्याचा टोला देखील त्यांनी मनसेसह (Supriya Sule) भाजपला लगावला.