Chinchwad : शेअर मार्केटमध्ये गुंतवणूक करण्यास सांगून महिलेची केली आर्थिक फसवणूक ; फसवणुकीचे धागेदोरे बँकॉकपर्यंत

एमपीसी न्यूज – वाकड पोलीस ठाण्यात शेअर मार्केट मध्ये गुंतवणूक करण्याच्या (Chinchwad) बहाण्याने फसवणूक केल्याचा गुन्हा दाखल आहे. त्यामध्ये आयबीकेआर सेक्युरिटीज या कंपनीत एका महिलेला पैसे गुंतवण्यास भाग पाडून तिची 10 लाख 69 हजार 575 रुपयांची फसवणूक केली होती. या गुन्ह्यातील चार आरोपींना पिंपरी-चिंचवड पोलिसांच्या सायबर सेलने अटक केली आहे. या प्रकरणाचे धागेदोरे थेट बँकॉक पर्यंत पोहोचले असल्याचे पोलीस तपासात उघड झाले आहे.

पोलीस उपायुक्त संदीप डोईफोडे यांनी दिलेल्या माहितीनुसार, वाकड येथील एक महिला फेसबुकवर पोस्ट बघत असताना तिला आयबीकेआर क्रेसेट अकादमी गोल्डमन सच हा व्हाटसअप ग्रुप दिसला. महिला त्या ग्रुपला जॉईन झाली. तिथे असलेल्या लोकांना रोजच्या रोज गुंतवणुकीवर नफा होत असल्याचे दिसले. त्यामुळे महिलेने आयबीकेआर सेक्युरिटीज या कंपनीत पैसे गुंतवण्यास तयारी दर्शवली.

Chinchwad : श्री जैन श्रावक संघाकडून पाच दिवसीय होळी चातुर्मासचे आयोजन

त्यांनतर आरोपींनी महिलेला एक लिंक पाठवून अॅप डाउनलोड करण्यास सांगितले. त्यावर महिलेने केलेली गुंतवणूक आणि त्यावर झालेला नफा दिसत होता. मात्र ते पैसे काढता येत नव्हते. आपली फसवणूक होत असल्याचे लक्षात आल्याने महिलेने याप्रकरणी वाकड पोलीस ठाण्यात गुन्हा नोंदवला. महिलेची 10 लाख 69 हजार 575 रुपयांची फसवणूक झाली होती.

हा गुन्हा सायबर सेलकडे वर्ग करण्यात आला. सायबर पोलिसांनी तांत्रिक विश्लेषण करून आरोपींची ओळखत पटवली. विकास नेमीनाथ चव्हाण (वय 43, रा. गणेश नगर, नवी सांगवी), प्रदीप कृष्णा लाड (वय 32, रा. पिंपळे गुरव, सांगवी) या दोघांना सायबर सेलने सांगवी परिसरातून अटक केली.

आरोपी हे फसवणुकीच्या पैशातून गुजरात येथील सोनाराच्या दुकानातून सोने खरेदी करत असल्याची माहीती सायबर सेलचे सहायक पोलीस निरीक्षक प्रविण स्वामी यांना माहिती मिळाली. त्या माहितीच्या आधारे आणि फिर्यादी महिलेने आरोपीच्या अकाऊंटला भरलेले पैसे यांचे तांत्रिक विश्लेषण करुन गुजरात मधून आरोपी अमित जगदिशचंद्र सोनी याला पोलिसांनी ताब्यात घेतले.

आरोपी सोनी याच्याकडे चौकशी केली असता, तो सोन्याच्या व्यापाऱ्यांकडून सोने घेतो आणि त्याचे रोख रकमेत रुपांतर करतो. ती रोख रक्कम सोनी हा अहमद नजीर गाझी याला देत होता. अहमद नजीर गाझी हा ती रोकड मुफ्दल व त्याचा भाऊ आबिद याला युएसडीटी मध्ये क्रिप्टोकरन्सी खरेदी करुन पाठवत असे.

गुन्ह्याचे धागेदोरे बँकॉकपर्यंत

आरोपी अहमद याचा सख्खा भाऊ आबिद व मुफ्दल हे दोघे बँकॉक मध्ये राहत आहेत. ते तिथल्या आंतराष्ट्रीय गुन्हेगारी टोळीसोबत काम करत असल्याचे तपासात निष्पन्न झाले आहे. आरोपींनी अद्यापपर्यंत सहा खात्यांमधील पैसे काढून रोख रक्कम युएसडीटी मध्ये बँकॉकला पाठविल्याचे समोर आले आहे. आरोपीच्या एकूण सहा अकाऊंटविरुध्द भारतामध्ये एकूण 177 तक्रारी अर्ज पोलिसांकडे आले आहेत. त्यामध्ये तब्बल 100 कोटीपेक्षा जास्त रकमेची फसवणूक झाली आहे.

ही कारवाई पोलीस आयुक्त विनयकुमार चौबे, अपर पोलीस आयुक्त वसंत परदेशी, पोलीस उप आयुक्त संदिप डोईफोडे, सहायक पोलीस आयुक्त विशाल हिरे यांच्या मार्गदर्शनाखाली वरिष्ठ पोलीस निरीक्षक वैभव शिंगारे, सहायक पोलीस निरीक्षक सागर पानमंद, सहायक पोलीस निरीक्षक प्रविण स्वामी, पोलीस उपनिरीक्षक सागर पोमन, पोलीस अंमलदार अतुल लोखंडे, बिचेवार, कृष्णा गवळी, रजनिश तारु यांच्या पथकाने केली (Chinchwad) आहे.