Pimpri: दिलासादायक! महापालिकेचे अचूक नियोजन, चार दिवसांत एकही ‘पॉझिटीव्ह’ रुग्ण नाही
नागरिकांनो घरीच रहा, असेच सहकार्य करा, दक्षता घ्या, महापालिकेचे आवाहन
एमपीसी न्यूज – पिंपरी-चिंचवड महापालिकेच्या उत्तम उपाययोजना, अचूक नियोजन, परदेशातून आलेल्या नागरिकांना शहरात येताच ‘होम क्वारंटाईन’ करणे आणि नागरिकांचे मिळत असलेले सहकार्य यामुळे मागील चार दिवसांपासून शहरात एकही ‘पॉझिटीव्ह’ रुग्ण आढळला नाही. ही शहरवासीयांसाठी दिलासादायक बाब आहे. त्यामुळे नागरिकांनी आता अधिक सहकार्य करावे. घरीच थांबावे, प्रशासनाच्या सुचनांचे पालन करावे. नागरिकांनी असेच सहकार्य केल्यास आपण नक्कीच कोरोनावर मात करू, कोरोनाला परतवून लावू असा विश्वास व्यक्त केला जात आहे.
पिंपरी-चिंचवड शहरात 12 मार्च रोजी पहिल्याचदिवशी कोरोनाचे तीन रुग्ण पॉझिटिव्ह आढळले होते. त्यामुळे एकच खळबळ उडाली. राज्यभरात सर्वाधिक रुग्ण पिंपरी-चिंचवड शहरामध्ये होते. त्यामुळे राज्याचे लक्ष शहराकडे लागले होते. त्यानंतर पॉझिटिव्ह रुग्णांची संख्या देखील वाढतच होती. महापालिका प्रशासनाने अतिशय उत्तम नियोजन केले.
पिंपरीतील वायसीएम रुग्णालय, भोसरीतील नवीन रुग्णालयात आयसोलेशन कक्षाची स्थापना केली. परदेशातून नागरिक शहरात येताच होम क्वारंटाईन केले. आजपर्यंत 1 हजार 21 नागरिकांना ‘होम क्वारंटाईन’मध्ये (वेगळ्या कक्षात) ठेवण्यात आले आहे. आजअखेर शहरातील 3 लाख 73 हजार 414 नागरिकांचे सर्वेक्षण करण्यात आले आहे. महापालिकेचे कर्मचारी अहोरात्र काम करत आहेत. महापालिका प्रशासनाने केलेल्या या उपाययोजनांमुळे कोरोनाची लागण होण्याची संख्या कमी झाली आहे.
पिंपरी-चिंचवड शहरात शुक्रवारी (दि.20) कोरोनाचा 12 पॉझिटिव्ह रुग्ण आढळला होता. चार दिवसांपासून हा आकडा स्थिर आहे. महापालिकेने वेळीच केलेल्या उपाययोजना, घेतलेली दक्षता यामुळे हा आकडा स्थिर आहे. परंतु, आता खरी नागरिकांची कसोटी आहे. तिस-या टप्प्यात आहोत. आता कोरोनाचे रुग्ण वाढण्याची सुरुवात झाली आहे. कधीही रुग्ण वाढू शकतात. त्यामुळे नागरिकांनी अधिक काळजी घ्यावी. घरातच रहावे. महापालिका प्रशासनाला सहकार्य करावे, असे आवाहन महापालिका प्रशासनाकडून केले जात आहे.
प्रभावी जनजागृती मोहीम
महापालिकेने केलेल्या उपाययोजना!
#वायसीएम, भोसरी, जिजामाता रुग्णालयात आयसोलेशन कक्ष
#परदेशातून नागरिक शहरात येताच होम क्वारंटाईन
#’होम ‘क्वॉरंटाईन’वर देखरेख ठेवण्यासाठी 100 ‘जलद प्रतिसाद टिम’
#घरोघरी जाऊन सर्वेक्षणासाठी 244 कर्मचा-यांची क्षेत्रीय सर्वेक्षण टिम
#महापालिकेमार्फत 8888006666 हेल्पलाईन नंबर
9922501450 हा व्हॉट्अॅप क्रमांक जाहीर
#शाळा, मॉल, जीम, जलतरण तलाव, नाट्यगृहे, क्रीडांगणे, उद्याने बंद
#कोरोनासंदर्भातील कामकाजासाठी 67331111, 67331556 संपर्क क्रमांक जाहीर
#’कोरोना’चा मुकाबला करण्यासाठी महापालिकेत नियंत्रण कक्ष
#औषध फवारणी
#’कोरोना’च्या जनजागृतीसाठी शहरात सर्वत्र फलक, पोस्टर्स