Pune: खडकवासला ते स्वारगेट सायकल ट्रॅक

पुणे महानगरपालिका हद्दीमध्ये आणि नव्याने समाविष्ट झालेल्या गावांच्या हद्दीमध्ये वाहतुकीची कोंडी आणि वाहनतळाची समस्या आहे. विकास आराखड्यामध्ये वाहनतळासाठी राखीव असलेल्या आणि नजिकच्या काळात पुणे महानगरपालिकेच्या ताब्यात येऊ शकणार्‍या विविध जागांवर वाहनतळ विकसित करण्यात येणार आहेत.

पुणेकर नागरिक विशेषतः शालेय विद्यार्थ्यांना वाहतुकीच्या नियमांची माहिती व्हावी यासाठी या उद्देशाने ब्रेमेन चौक परिसरात वाहतूक विषयक माहिती देणारा  ट्रॅफिक  पार्क उभारण्यात येणार आहे. या परिसरातील ११ शाळांतील पाच हजारहून अधिक विद्यार्थ्यांना या उपक्रमाचा लाभ होणार आहे. अशाच प्रकारचा ट्रॅफिक पार्क या वर्षी येरवड्यात प्रस्तावित आहे.

पूर्व आणि पश्‍चिम उपनगराला जोडणार्‍या शिवणे ते खराडी या १८ किलोमीटरच्या रस्त्याच्या कामाला गती मिळणार आहे. शिवणे ते म्हात्रे पूल या टप्प्यातील ६ किलोमीटर आणि संगमवाडी ते खराडी या टप्प्यातील ११ किलोमीटर ५०० मीटर रस्त्याचे काम प्रगतीपथावर आहे. सद्यस्थितीत या रस्त्याचे ६० टक्के काम पूर्ण झाले आहे.

कात्रज-कोंढवा रस्त्यावरील वाहतुकीची कोंडी सोडविण्यासाठी या रस्त्याची निर्मिती करण्यात येत आहे. त्यासाठी विशेष कक्ष स्थापन करण्यात आला आहे. या कक्षाद्वारे भूसंपादनासह रस्तानिर्मिती सर्व कामे केली जाणार आहेत. कात्रज चौकातील राजस सोसायटी ते कोंढवा-खडी मशीन चौकापर्यंतच्या साडेतीन किलोमीटर लांबीचा आणि ८४ मीटर रूंदीचा रस्ता विकसित करण्यात येत आहे.

विधी महाविद्यालय रस्ता, सेनापती बापट रस्ता आणि कर्वे रस्त्यावरील वाहतुकीची कोंडी कमी व्हावी यासाठी विकास आराखड्यात दोन किलोमीटर लांबीचा आणि ३० मीटर रुंदीचा बालभारती-पौड फाटा रस्ता दर्शविण्यात आला आहे. या रस्त्यामुळे पर्यावरणावर काय परिणाम होणार आणि या वाहतूक परिणाम अहवाल तयार करण्यात आले आहेत. सल्लागाराच्या सादरीकरणाला मान्यता मिळाल्यानंतर विकसनाचे काम हाती घेण्यात येणार आहे.