पुण्यात सैन्य भरती पेपर फुटी प्रकरणी आठ जणांना अटक

सैन्य दलातील अधिकाऱ्यांचा समावेश असण्याची दाट शक्यता

हडपसर येथील भेकराई नगर येथे आज होणाऱ्या सैनिक भरतीचा सराव पेपर लीक आला आहे. आज होणाऱ्या परीक्षेची प्रश्नपत्रिका देण्यासाठी 70 ते 80 जणांकडून प्रत्येकी 3 लाख रुपये घेतल्याची प्राथमिक माहिती मिळत आहे .या प्रकरणी 8 जणांना अटक करण्यात आली असून या प्रकरणामध्ये सैन्य दलातील वरिष्ठ अधिकाऱ्यांचा समावेश असण्याची दाट शक्यता आहे.

संतोष शिंदे आणि धनाजी जाधव असे अटक करण्यात आलेल्या दोघांची नाव आहे. याप्रकरणी हडपसर पोलीस ठाण्यात गुन्हा दाखल करण्याचे काम सुरु आहे.

याप्रकरणी अधिक माहिती अशी की, पुण्यातील भेक्राईनगर येथे आज सैन्य दलातील भरतीसाठी लेखी परीक्षा होती. त्यासाठी आरोपींनी 70 ते 80 उमेदवारांना भेकराई नगर येथे काल रात्री अकरा वाजता बोलावले होते. त्यानंतर त्यांच्याकडून प्रत्येकी 3 लाख रुपये घेत व्हाट्सअपद्वारे त्यांना प्रश्नपत्रिका दिली.

ठाणे पोलिसांना याची सर्वप्रथम माहिती मिळाली होती. त्यानंतर त्यांनी पुणे पोलीस आयुक्त रश्मी शुक्ला यांना याबाबतची माहिती दिली. त्यानंतर सहायक आयुक्त सुरेश भोसले युनिट एकचे विनोद पाटील व त्यांच्या कर्मचाऱ्यांनी कारवाई करत 8 आरोपीनी अटक केली. ठाणे पोलिसांनी या प्रकरणात आतापर्यंत १८ आरोपींसह ३५० विद्यार्थ्यांना ठाणे, पुणे, नाशिक, नागपूरसह गोव्यात शनिवारी रात्री उशीरा छापे टाकून आरोपी आणि विद्यार्थ्यांना अटक करण्यात आली आहे.

ही प्रश्नपत्रिका नागपूरहून फुटली असून सैन्य दलातील अनेक बडे अधिकाऱ्यांचा या प्रकरणात समावेश असण्याची दाट शक्यता आहे.

यातील आरोपी धनाजी जाधव याच्यावर यापूर्वीही सैन्य दलातील भरती घोटाळ्यासंदर्भत गुन्हा आहे. हा देशव्यापी घोटाळा असण्याची देखील शक्यता आहे.