Pimpri Corona Update : शहरात आज 93 मृत्यू; 2 हजार 516 नवीन रुग्णांची नोंद

एमपीसी न्यूज – पिंपरी-चिंचवड शहरात कोरोनामुळे 93 जणांच्या मृत्यूची आज (गुरुवारी) नोंद झाली. तर, शहराच्या विविध भागातील 2 हजार 516 नवीन कोरोना बाधित रुग्णांची नोंद झाली आहे.

उपचाराला दहा दिवस पूर्ण झालेल्या आणि कोणतीही लक्षणे नसलेल्या 2247 जणांना डिस्चार्ज देण्यात आला आहे. शहरातील 49 आणि महापालिका हद्दीबाहेरील 44 अशा 93 जणांचा आज मृत्यू झाला.

त्यात 55 पुरुष आणि 38 महिला रुग्णांचा समावेश आहे. मागील चोवीस तासात 22 मृत्यू झाले आहेत. यापूर्वी मृत्यू झालेल्या केसेस आज कळविल्यामुळे मृत्यूचा आकडा वाढला असल्याचे वैद्यकीय विभागाने सांगितले.

शहरात आजपर्यंत 2 लाख 8 हजार 417 जणांना कोरोनाची लागण झाली आहे. त्यातील 1 लाख 83 हजार 86 जण बरे होऊन घरी गेले आहेत. शहरातील 2880 जणांचा तर शहराबाहेरील परंतू महापालिका रूग्णालयात उपचार घेणार्‍या 1381 अशा 4 हजार 261 जणांचा आजपर्यंत कोरोनामुळे मृत्यू झाला.

सध्या 8 हजार 472 सक्रीय रूग्णांवर पालिका रुग्णालयामध्ये उपचार सुरू आहेत. तर, 2 हजार 848 जणांचे चाचणी अहवाल प्रतिक्षेत आहेत. आजपर्यंत 3 लाख 86 हजार 347 जणांनी कोरोना प्रतिबंधक लस घेतली.