Pune: संचारबंदी असतानाही भाजीपाला खरेदीसाठी झुंबड
एमपीसी न्यूज – कोरोना विषाणूचा प्रसार रोखण्यासाठी राज्यात संचारबंदी लागू करण्यात आलेली असतानाही पुण्यात गुलटेकडी मार्केटयार्ड येथे भाजी खरेदीसाठी नागरिकांनी प्रचंड गर्दी करून आज कहरच केला.
शहरात किमान चार दिवस पुरेल एवढी भाज्यांची आवक झालेली असल्याने नागरिकांनी विनाकारण खरेदीसाठी गर्दी करू नये, असे आवाहन उपमुख्यमंत्री व जिल्ह्याचे पालकमंत्री अजित पवार यांनी केले आहे.
जीवनावश्यक वस्तू म्हणून भाजी खरेदीसाठी जाण्यास संचारबंदीतही मुभा देण्यात आली आहे. त्याचा गैरफायदा उठवत नागरिकांनी मार्केटयार्ड येथे मंगळवारी सकाळी भाजी खरेदीसाठी एकच गर्दी केली. नागरिकांनी गर्दी करू नये, म्हणून वारंवार आवाहन करून देखील लोक ऐकण्याच्या मनस्थितीत नव्हते. लोखंडी बॅरिकेड्स उभे करून पोलिसांनी गर्दी नियंत्रित करण्याचा प्रयत्न केला असता काहीशी चेंगराचेंगरी देखील झाली.
कोरोना हा संसर्गजन्य रोग असल्याने गर्दी टाळावी, असे आवाहन करण्यात येत आहे. तरी देखील लोक भाजी खरेदीच्या नावाखाली गर्दी करून कोरोना संसर्गाचा धोका वाढवत आहेत. अनेक नागरिक मास्क न लावताच गर्दीत वावरत असल्यामुळे सार्वजनिक आरोग्य धोक्यात येण्याची भीती व्यक्त करण्यात येत आहे.