Talegaon Dabhade: शहरात एकही कोरोनाबाधित नाही, लिंब फाटा ते स्टेशन चौक रस्त्यावर एकेरी वाहतूक
एमपीसी न्यूज – ‘कोरोना’ विषाणूचा वाढता संसर्ग आणि प्रार्दुभाव रोखण्यासाठी तळेगाव दाभाडे नगरपरिषद व प्राथमिक आरोग्य केंद्र आणि तळेगाव दाभाडे पोलिसांचे युद्ध पातळीवर प्रयत्न सुरू आहेत. परदेशात जाऊन आलेल्या एकूण 47 जणांना होम क्वारंटाईन करण्यात आले होते. त्यापैकी 24 जणांची 14 दिवसानंतरची कोरोना चाचणी निगेटीव्ह आली आहे. लिंब फाटा ते तळेगाव स्टेशन चौक हा मुख्य रस्ता वाहतुकीसाठी ‘वन वे’ करण्यात आला आहे.
शहरातील नागरिकांच्या आरोग्याला बाधा येऊ नये म्हणून नगरपरिषदेचा आरोग्य विभाग सतर्क झाला आहे. कोरोनाच्या पार्श्वभूमीवर नगरपरिषदेच्या वतीने नवनवीन संकल्पना राबविण्यात येत असून त्यात त्यांना चांगले यश आल्याचे दिसून येत आहे. तळेगाव शहरात कोरोनाचा एकही पॉझिटीव्ह रुग्ण नाही. कोरोनाबाबत कोणीही अफवा पसरवू नये, असे आवाहन नगरपरिषद प्रशासनाने केले आहे.
