Undri : गॅस शेगडी दुरुस्तीच्या दुकानात सिलेंडर फुटल्याने दोनजण जखमी
एमपीसी न्यूज- गॅस शेगडी दुरुस्तीचे काम चालू असताना अचानक सिलेंडरमधून गॅस गळती होऊन स्फोट झाला. यामध्ये दोन जण जखमी झाले. ही घटना आज, मंगळवारी मध्यरात्री 1 वाजता उंड्री येथील अतुल नगर बसस्टॉप जवळ घडली.
अग्निशमन विभागाने दिलेल्या माहितीनुसार, अतुल नगर बसस्टॉपजवळ असलेल्या सहा माजली इमारतीच्या तळमजल्यावर गॅस शेगडी दुरुस्तीचे दुकान आहे. या दुकानात गॅस शेगडी दुरुस्तीचे काम चालू असताना अचानक सिलेंडरमधून गॅस गळती होऊन स्फोट झाला. घटनेची माहिती मिळताच अग्निशामक दलाच्या जवानांनी धाव घेत आगीवर नियंत्रण मिळवले. या घटनेत जखमी झालेल्या दुकानाच्या मालकासह आणखी एकास स्थानिक नागरिकांनी उपचारासाठी रुग्णालयात दाखल केले. या दुकानात 1 कमर्शियल, 8 घरगुती व 25 छोट्या सिलेंडरचा साठा होता.
