Pune RTO News : दुचाकींसाठी नोंदणी क्रमांकाची नवीन मालिका; आकर्षक क्रमांकासाठी नोंदणी करा
एमपीसी न्यूज – पुणे प्रादेशिक परिवहन कार्यालय येथे लवकरच (Pune RTO News) दुचाकी वाहनांसाठी नवीन मालिका सुरु करण्यात येत आहे. या मालिकेतील आकर्षक नोंदणी क्रमांक तीनपट शुल्क भरून खासगी चारचाकी वाहनांसाठी राखून ठेवण्यासाठी तसेच उर्वरित क्रमांकाबाबत दुचाकींसाठी आगाऊ अर्ज स्वीकारण्याची व लिलाव कार्यपद्धतीची प्रक्रिया सुरू करण्यात आली आहे.
नव्याने सुरु होणाऱ्या दुचाकी मालिकेतील आकर्षक तसेच पसंतीचे क्रमांक घेण्यासाठी तीनपट शुल्क भरावे लागेल. अशा चारचाकी वाहन मालकांनी 5 एप्रिल रोजी सकाळी साडे दहा ते दुपारी अडीच वाजेपर्यंत विहित नमुन्यात अर्ज करावा.
ITI: ऍप्टीट्युड टेस्टमध्ये 160 विद्यार्थ्यांचा सहभाग
एकाच क्रमांकाकरीता एकापेक्षा जास्त अर्ज आल्यास त्याची यादी 6 एप्रिल रोजी सकाळी कार्यालयाच्या सूचना फलकावर प्रसिद्ध करण्यात येणार आहे. याच दिवशी लिलावाचे धनाकर्ष (डीडी) दुपारी अडीच वाजेपर्यंत स्वीकारले जातील व प्राप्त अर्जासाठीचा लिलाव दुपारी चार वाजता सहायक प्रादेशिक परिवहन अधिकारी, नवीन वाहन नोंदणी विभाग यांच्या कक्षात करण्यात येईल.
दुचाकी वाहन मालकांनी आकर्षक तसेच पसंतीचे क्रमांक विहित (Pune RTO News) शुल्क भरून हवे असल्यास 6 एप्रिल रोजी सकाळी साडे दहा ते दुपारी अडीच वाजेपर्यंत अर्ज करावा. एकाच क्रमांकाकरीता एकापेक्षा जास्त अर्ज असल्यास त्याची यादी त्याच दिवशी सायंकाळी कार्यालयाच्या सूचना फलकावर प्रसिद्ध करण्यात येणार आहे. 10 एप्रिल रोजी लिलावाचे डीडी दुपारी अडीच वाजेपर्यंत स्वीकारले जातील व प्राप्त अर्जासाठीचा लिलाव दुपारी 4 वाजता सहकार सभागृहामध्ये करण्यात येईल.
अर्ज कार्यालयाच्या खासगी वाहन नोंदणी विभागात धनाकर्ष (डीडी), पत्त्याचा पुरावा, आधारकार्ड, ओळखपत्र, पॅनकार्डच्या साक्षांकित प्रतीसह आधारकार्डला लिंक असलेल्या मोबाईल क्रमांकासह जमा करावा. हा डीडी ‘आर.टी.ओ.,पुणे’ यांच्या नावे राष्ट्रीयकृत, अनूसचित बँकेचा पुणे येथील असावा.
एकदा राखून ठेवलेला नोंदणी क्रमांक बदलून देता येणार नाही. नोंदणी क्रमांक राखून ठेवलेल्या दिनांकापासून 30 दिवसांच्या आत नोंदणीसाठी वाहन सादर केले नाही तर राखून ठेवलेला नोंदणी क्रमांक आपोआप रद्द होईल व शुल्क सरकारजमा होईल. कोणताही विशिष्ट नोंदणी क्रमांक राखीव ठेवण्यासाठी प्रदान केलेले शुल्क परत करता येणार नाही.
प्रादेशिक परिवहन कार्यालय पुणे यांच्या कार्यक्षेत्रातील वाहनधारकांनीच अर्ज सादर करावेत, कार्यक्षेत्राबाहेरील अर्ज बाद ठरविण्यात येतील, असे सहायक प्रादेशिक परिवहन अधिकारी, पुणे यांनी सांगितले.
