Pune : सनबर्नसाठी डोंगर फोडण्यास काँग्रेस पर्यावरण विभागाचा ठाम विरोध ; कारवाईसाठी आदेश मिळवले

एमपीसी न्यूज- सनबर्न फेस्टिव्हल हा सांस्कृतिक आणि पर्यटनाला प्रोत्साहन देण्यासाठी आयोजित करायचा असल्यास आमचा विरोध नाही, पण त्यांना पायघड्या घालण्यासाठी डोंगर फोडून पर्यावरणाचे अपरिमित नुकसान करण्यास काँग्रेस पर्यावरण विभागाचा ठाम विरोध आहे. संवैधानिक मार्गाने आंदोलन करून या डोंगरफोडीविरोधात कारवाईसाठी महसूल विभागाचे आदेश मिळवले असल्याची माहिती अशोक मोरे, गिरीश खाटपे, पराग आठवले यांनी गुरुवारी पत्रकार परिषदेत दिली.

कारवाईसाठी बारकाईने पाठपुरावा चालू असून या डोंगरफोडीविरुद्ध सनबर्न फेस्टीव्हलमध्ये आंदोलन करणार असल्याचा पुनरुच्चार त्यांनी केला .

पत्रकार परिषदेत काँग्रेसच्या पर्यावरण विभागाचे प्रदेशाध्यक्ष अशोक मोरे, प्रदेश सरचिटणीस पराग आठवले, प्रदेश सरचिटणीस अमर नाणेकर, जिल्हा पर्यावरण विभागाचे अध्यक्ष गिरीश खाटपे, अस्लम शेख (पर्यावरण विभाग ,जिल्हा उपाध्यक्ष )यांनी शासकीय अनागोंदी आणि पर्यावरणविषयक अनास्थेचा पर्दाफाश केला. महसूल विभागाचे कारवाईचे आदेश मिळवल्याचे कागद सादर केले.