Pune : राजीव गांधी प्राणी संग्रहालयात सोमवारपासून वन्यजीव सप्ताह

वन्यजीव सप्ताह हा संपूर्ण देशात ऑक्टोबरच्या पहिल्या आठवड्यात वन्यजीवांचे संरक्षण आणि जनजागृती करण्याकरिता साजरा करण्यात येतो. याची पहिली सुरूवात १९५८ साली लुप्त होणा-या प्राण्यांच्या संरक्षणासाठी लोकांचा सहभाग वाढविण्याकरिता करण्यात आली.

या सप्ताहामध्ये वन्यजीव व पर्यावरण संरक्षण या विषयावर आज (१ ऑक्टोबर), टाकाऊतून टिकाऊ वस्तूंचे प्रदर्शन तसेच पुढील प्रत्येक दिवशी एक याप्रमाणे २ ऑक्टोबरला चित्रकला, ३ ऑक्टोबरला रांगोळी, ४ ऑक्टोबर रोजी चालता-बोलता, वाईल्डलाईफ हा प्रश्नमंजुषेचा कार्यक्रम तर, ६ ऑक्टोबर रोजी सर्व अबालवृद्धांसाठी पर्यावरण संरक्षण विषयावर पपेट शो आणि पथनाट्य स्पर्धेचे आयोजन करण्यात आले आहे.

याशिवाय दररोज व्याख्यानमालेतून वन्यजीव संरक्षणाविषयी प्रबोधन करण्यात येणार आहे. स्पर्धे दरम्यान विद्यार्थीनी काढलेल्या चित्रांचे व रांगोळीचे प्रदर्शन नागरिकांना पाहण्याकरिता संपूर्ण सप्ताह उपलब्ध असणार आहे. ७ ऑक्टोबर रोजी विजेत्या स्पर्धकांना बक्षिसांचे वितरण केले जाणार आहे.