Rashmi Shukla : रश्मी शुक्लांना मोठा दिलासा, फोन टॅपिंग प्रकरणात क्लोजर रिपोर्ट दाखल?

रश्मी शुक्ला या राज्य गुप्त वार्ता विभागाच्या आयुक्तपदी कार्यरत असताना त्यांनी बच्चू कडू, नाना पटोले, संजय काकडे, आशिष देशमुख यांना विविध नावे देत त्यांचे फोन टॅपिंग केल्याचा ठपका त्यांच्यावर ठेवण्यात आला होता. राज्याच्या पावसाळी अधिवेशनात प्रश्न उपस्थित झाल्यानंतर या प्रकरणी सखोल चौकशी करण्याचे आदेश देण्यात आले होते. चौकशीचा अहवाल आल्यानंतर बंडगार्डन पोलीस ठाण्यात शुक्ला (Rashmi Shukla) यांच्या विरोधात गुन्हा दाखल करण्यात आला होता. पोलीस या प्रकरणाचा तपास करत होते.

दरम्यान, राज्यात महाविकास आघाडीचे सरकार जाऊन पुन्हा शिंदे फडणवीस सरकार आले. त्यानंतर नव्याने आलेल्या सरकारकडून या संपूर्ण प्रकरणाचा तपास केंद्रीय गुन्हे अन्वेषण विभागामार्फत करण्यात येणार असल्याचे सांगितले होते. मात्र, आता पुणे पोलिसांनी या संपूर्ण प्रकरणात क्लोजर रिपोर्ट सादर केला असल्याची माहिती समोर येत आहे.