Badlapur News : बदलापूरच्या एमआयडीसी परिसरातील कंपनीत गॅस गळती

एमपीसी न्यूज : बदलापूरच्या एमआयडीसी परिसरातील एका रासायनिक कंपनीत गॅसगळती झाली आहे. रिऍक्टरमध्ये सल्फ्युरिक अॅसिड जास्त पडल्याने ही गॅसगळती झाल्याची प्राथमिक माहिती समोर आली आहे. अग्निशमन दलाने तात्काळ परिस्थिती नियंत्रणात आणल्याने मोठी दुर्घटना टळली. मात्र मात्र या दुर्घटनेनंतर परिसरातील नागरिकांना श्वास घेण्याच्या  अडचणींचा सामना करावा लागला. सुदैवाने यात कोणतीही जीवितहानी झालेली नाही. 

बदलापूरच्या एमआयडीसीत काल (4 जून) रात्री जवळपास 10.22 मिनिटांनी रासायनिक कंपनीत गॅस गळती झाल्याने एकच खळबळ उडाली. या घटनेनंतर परिसरात मोठी घबराट पसरली. तसेच शिरगाव, आपटेवाडी भागात अनेक लोकांना श्वास घ्यायला त्रास होऊ लागला. जवळपास दोन तासांनी म्हणजे रात्री 11.24 मिनिटांनी अग्निशमन दलाने परिस्थितीवर नियंत्रण मिळवले. सध्या ही परिस्थिती नियंत्रणात असून कोणतीही जीवितहानी झालेली नाही, असे ठाणे महानगरपालिकेने सांगितले आहे.

बदलापूर एमआयडीसीत नोबेल इंटरमिडीएट्स नावाची रासायनिक कंपनी आहे. या कंपनीतील रिऍक्टरमध्ये काल रात्री ही गॅस गळती झाली. या रिऍक्टरमध्ये सल्फ्युरिक अॅसिड आणि मिथाईल बेंझाईन एकत्र केलं जात होतं. मात्र त्यावेळी यात सल्फ्युरिक अॅसिड जास्त पडल्याने अचानक रिऍक्टरमधून गॅस लीक झाला. त्यानंतर काही क्षणातच हा गॅस आजूबाजूच्या परिसरात पसरला.

हा गॅस ज्वलनशील नसला, तरी त्यामुळे परिसरातल्या लोकांना श्वास घ्यायला त्रास होणं, डोळे जळजळणं असे त्रास होऊ लागले. याबाबतची माहिती मिळताच अग्निशमन दलाने तात्काळ घटनास्थळी धाव घेतली. त्यानंतर ही गळती रोखण्यात आली. त्याशिवाय रिऍक्टरचं कुलिंग ऑपरेशन केलं. या घटनेत कुणालाही दुखापत झालेली नाही. तसेच सध्या ही परिस्थिती पूर्णपणे नियंत्रणात असल्याची माहिती मुख्य अग्निशमन अधिकारी भागवत सोनोने यांनी दिली आहे.