Pimpri News : ‘मुळा नदी सुधार’साठी खासगी जागेचे भूसंपादन, नुकसान भरपाईपोटी द्यावे लागणार 175 कोटी
एमपीसी न्यूज – पिंपरी-चिंचवड महापालिकेच्या (Pimpri News) वतीने मुळा नदी पुनरुज्जीवन (सुधार) प्रकल्प राबविण्यात येणार आहे. त्यासाठी नदीच्या डाव्या बाजूच्या अर्थात महापालिका हद्दीतील वाकड, पिंपळे निलख, सांगवीतील नदी काठच्या निळ्या पूर रेषेतील व निळ्या पूररेषेबाहेरील खासगी जागेचे भूसंपादन केले जाणार आहे. जमीनमालकांना नुकसान भरपाई देण्यासाठी 175 कोटी रुपयांच्या खर्चास महापालिका आयुक्त तथा प्रशासक शेखर सिंह यांनी मंजुरी दिली.
पुणे व पिंपरी-चिंचवड महापालिका संयुक्तीपणे मुळा नदी सुधार प्रकल्प राबवित आहे. प्रकल्पाचा सल्लागार एकच असला. तरी, दोन्ही पालिकेने स्वतंत्र निविदाप्रक्रिया राबविली आहे. पिंपरी-चिंचवड महापालिकेने वाकड बायपास ते बोपखेल या 14.20 किलोमीटरपैकी वाकड ते सांगवी पुलापर्यंत असे 8.80 किलोमीटर अंतराच्या एका बाजूच्या कामासाठी 321 कोटी खर्चाची निविदा प्रसिद्ध केली आहे.
Alandi : प्रक्षाळपूजे निमित्त श्री नृसिंह सरस्वती महाराजांच्या मठामध्ये गर्दी
या प्रकल्पाच्या आराखड्यात निश्चित करण्यात आलेली नदीकाठची खासगी (Pimpri News) जागा भूसंपादित करण्यात येणार आहे. त्यात वाकड, पिंपळेनिलख व सांगवी या भागात निळ्या पूर रेषेतील व निळ्या पूर रेषेबाहेरील जागा आहे. त्या खासगी जागा भूसंपादन करण्यासाठी अंदाजे 175 कोटी नुकसान भरपाई जमीनमालकांना द्यावी लागणार आहे. हे भूसंपादन नगररचना व विकास विभागाकडून केले जाणार आहे. त्यासाठी येणा-या प्रत्यक्ष खर्चास आयुक्तांनी मान्यता दिली. या भूसंपादनासाठी पुणे जिल्हाधिकारी कार्यालयाची मान्यताही घेण्यात येणार आहे. भूसंपादन केल्यानंतर प्रकल्पाचे काम करणे सुलभ होणार असल्याचा पालिकेचा दावा आहे.
