Pavana Dam : पवना धरण परिसरात पावसाची हजेरी; धरणातील पाणीसाठा 82 टक्क्यांवर
एमपीसी न्यूज – काही दिवस विश्रांती (Pavana Dam) घेतल्यानंतर पावसाने पुन्हा हजेरी लावली आहे. पिंपरी-चिंचवडसह मावळवासीयांची तहान भागविणा-या पवना धरण परिसरातही पावसाचा जोर वाढू लागला आहे. मागील चोवीस तासात धरण परिसरात 52 मिली मीटर पावसाची नोंद झाली. धरणातील एकूण पाणीसाठा 82.42 टक्क्यांवर पोहोचला आहे. दरम्यान गतवर्षी आजच्या तारखेला 94. 17 टक्के पाणीसाठा धरणात होता. त्यातुलनेत यंदा 10 तक्यांनी पाणीसाठा कमी आहे.
पिंपरी-चिंचवडसह मावळ भागातील विविध गावांचा पाण्याचा मुख्य स्रोत पवना धरण आहे. महापालिका सध्या धरणातून 510 एमएलडी पाणी उचलते. शहराला पाणीपुरवठा करण्यासाठी पवना नदीवरील रावेत – पुनावळे दरम्यान असलेल्या बंधा-यातून अशुद्ध जलउपसा करण्यात येतो. सेक्टर 23 निगडी येथे पाणी शुद्ध करुन शहरवासीयांना पुरवठा केला जातो. यंदा उष्णतेची लाट, पाण्याचा वापर वाढल्याने धरणातील पाणी झपाट्याने कमी झाले होते. त्यातच यंदा पावसानेही मोठी ओढ दिली होती.
जून महिन्यात पाऊस पडला नाही. त्यामुळे महापालिकेने दैनंदिन पाणीवापर अत्यंत काटकसरीने करावा. दैनंदिन पाणीवापर असाच सुरु राहिल्यास आणि पाऊस लांबणीवर गेल्यास तीव्र पाणीटंचाई निर्माण होण्याची शक्यता आहे. त्यासाठी महापालिकेने मोठ्या प्रमाणात पाणी कपात करावी, अशी सूचना पाटबंधारे विभागाने महापालिका प्रशासनाला केली होती. त्यानुसार महापालिकेनेही आणखी पाणी कपात करण्याचे नियोजन सुरू केले होते. परंतु, 1 जुलै पासून दमदार पावसाला सुरुवात झाली. झपाट्याने धरणातील पाणीसाठा वाढला. त्यामुळे वाढीव पाणीकपात टळली. परंतु, जुलै महिन्याच्या शेवटच्या आठवड्यापासून पावसाने चांगलीच विश्रांती घेतली होती. त्यामुळे धरणात गतवर्षीपेक्षा कमी पाणीसाठा झाला आहे. मागील दोन दिवसांपासून पावसाने पुन्हा हजेरी लावली आहे. त्यामुळे धरणातील पाणीसाठ्यात वाढ होऊ लागली आहे.
पवना धरणातील परिस्थिती – Pavana Dam
गेल्या 24 तासात झालेला पाऊस = 55 मि.मि.
1 जूनपासून झालेला पाऊस = 1, 721 मि.मि.
गेल्या वर्षी आजच्या तारखे पर्यंत झालेला एकूण पाऊस = 1,972 मि.मि.
धरणातील सध्याचा पाणीसाठा = 82.42 टक्के”
गेल्या वर्षी आजच्या तारखेचा धरणातील पाणीसाठा = 94.17 टक्के
