Assembly Bye-Elections: कसबा, चिंचवडची पोटनिवडणूक जाहीर, 27 फेब्रुवारीला मतदान
एमपीसी न्यूज : पुण्यातील कसब्याच्या भाजप आमदार (Assembly Bye-Elections) मुक्ता टिळक आणि चिंचवडचे आमदार लक्ष्मण जगताप यांचे निधन झाल्यामुळे रिक्त झालेल्या जागी पोटनिवडणूक जाहीर झाली आहे. 7 फेब्रुवारीला अर्ज भरण्याची अंतिम मुदत आहे. तर, 27 फेब्रुवारीला मतदान आणि 2 मार्चला मतमोजणी असणार आहे. या निवडणुकीत भाजपची प्रतिष्ठा पणाला लागणार आहे.
भाजप आमदार मुक्ता टिळक यांचे 22 डिसेंबर 2022 रोजी दीर्घ आजाराने निधन झाले होते. चिंचवडचे भाजप आमदार लक्ष्मण जगताप यांचे 3 जानेवारी 2023 रोजी कर्करोगाने निधन झाले होते.
त्यामुळे कसबा पेठ विधानसभा मतदारसंघ आणि चिंचवड विधानसभा मतदारसंघ या दोन्ही जागांसाठी पोटनिवडणूक (Assembly By-Elections) केंद्रीय निवडणूक आयोगाने जाहीर केली आहे.
या निवडणूकीसाठीची अधिसूचना 31 जानेवारी रोजी जारी करण्यात येणार आहे. 7 फेब्रुवारी अर्ज दाखल करण्याची शेवटची तारीख असणार आहे.
8 फेब्रुवारी अर्जांची छाननी तर 10 फेब्रुवारी पर्यंत अर्ज परत घेता येणार आहेत. या दोन्ही पोटनिवडणूकांसाठी मतदान 27 फेब्रुवारी रोजी होणार आहे. या निवडणूकीचा निकाल 2 मार्च रोजी जाहीर होईल.
या निवडणुकीत भाजपची प्रतिष्ठा पणाला लागणार आहे. भाजप विरोधात दोन्ही जागांवर महाविकास आघाडी उमेदवार देण्याची शक्यता आहे. दोन्ही जागेवर भाजपकडून कुणाला उमेदवारी मिळणार याकडे आता लक्ष लागले आहे.