Pune : पुणे लोकसभा निवडणूक लढविण्यासाठी काँग्रेसतर्फे 20 जण इच्छुक

एमपीसी न्यूज – देशात लोकसभा निवडणुकीची जोरदार तयारी (Pune)सुरू आहे. त्या पार्श्वभूमीवर आघाडी घेत काँग्रेस पक्षातर्फे आगामी पुणे लोकसभा मतदारसंघ निवडणुकीसाठी काँग्रेसने इच्छुक उमेदवारांचे अर्ज मागविले. त्यानुसार काँग्रेसकडे 20 जण इच्छुक उमेदवार आहेत.

महाराष्ट्र प्रदेश काँग्रेस कमिटीच्या आदेशानुसार पुणे शहर जिल्हा काँग्रेस कमिटीच्यावतीने आगामी पुणे लोकसभा मतदारसंघ निवडणुकीसाठी इच्छुक उमेदवारांचे अर्ज मागविले आहेत.

संपूर्ण माहितीसह हे अर्ज दि. 9 जानेवारी 2024 पर्यंत (Pune)सकाळी 11 ते सायंकाळी 5 या वेळेत पक्ष कार्यालय काँग्रेस भवन शिवाजीनगर, पुणे येथे देण्याची विनंती शहराध्यक्ष अरविंद शिंदे यांनी पत्राद्वारे केली होती.

BJP : बाळासाहेब ठाकरे असते तर जितेंद्र आव्हाड यांचे काय झाले असते? – डॉ.संजय पांडे

पुणे लोकसभा निवडणुकीसाठी शहराध्यक्ष अरविंद शिंदे, आमदार रविंद्र धंगेकर, माजी आमदार मोहन जोशी, प्रवक्ते गोपाळ तिवारी, प्रदेश सरचिटणीस ऍड. अभय छाजेड, माजी मंत्री बाळासाहेब शिवरकर, माजी आमदार अनंत गाडगीळ, माजी आमदार दीप्ती चवधरी, संजय बालगुडे, माजी उपमहापौर आबा बागुल, माजी नगरसेवक दत्ता बहिरट, विरेंद्र किराड, संगीता तिवारी, नरेंद्र व्यवहारे, प्रदेश प्रतिनिधी यशराज पारखी, मुकेश धिवार, राजू कांबळे, मानोज पवार, संग्राम खोपडे, दिग्विजय जेधे, असे 20 जण पुणे लोकसभा मतदारसंघाची निवडणूक लढविण्यासाठी प्रबळ इच्छुक उमेदवार आहेत. दरम्यान, भाजपचे दिवंगत खासदार गिरीश बापट यांच्या निधनानंतर ही पोटनिवडणूक होणे गरजेची होती. ती निवडणूक न झाल्याबद्दल उच्च न्यायालयाने निवडणूक आयोगाला सुनावले. आता सार्वत्रिक निवडणूक लवकरच जाहीर होणार आहे.

माजी महापौर मुक्ता टिळक यांच्या निधनानंतर कसबा पेठ विधानसभा मतदारसंघात पोटनिवडणूक झाली. त्यामध्ये रविंद्र धंगेकर विजयी झाले. त्यामुळे आता काँग्रेसचा आत्मविश्वास कमालीचा वाढला आहे. काँग्रेसचे प्रदेशाध्यक्ष नाना पटोले यांनीही पुणे लोकसभा मतदारसंघ जिंकणार असल्याचा दावा केला आहे. त्यामुळे महाविकास आघाडीतील घटक पक्षांना काँग्रेसचा प्रचार करावा लागणार आहे.