Pune : खडकवासला धरण साखळीत सरासरी 89 टक्के पाणीसाठा

एमपीसीन्यूज- पुणे शहराला पाणीपुरवठा करणाऱ्या खडकवासला, पानशेत, वरसगाव, टेमघर या चार धरण परिसरात पावसाने चांगलीच हजेरी लावली असून या धरण साखळीमध्ये सरासरी 88.72 टक्के पाणीसाठा झाला आहे.

आज, गुरुवारी सकाळी आलेल्या आकडेवारीनुसार, खडकवासला धरण परिसरामध्ये मागील 24 तासात 33 मिमी पाऊस पडला असून आजपर्यंत 729 मिमी पावसाची नोंद झाली आहे. धरणाच्या पाणीसाठ्यामध्ये 1.97 टीएमसी इतकी वाढ झाली असून धरण 100 टक्के भरले आहे.

पानशेत धरणाच्या पाणलोट क्षेत्रामध्ये मागील 24 तासात 92 मिमी पाऊस झाला असून पाणी पातळीमध्ये 10.57 टीएमसीने वाढ झाली आहे. यंदाच्या मोसमात आजपर्यंत 1965 मिमी इतका पाऊस पानशेत धरण परिसरामध्ये झाला असून धरण 99.27 टक्के भरले आहे.

वरसगाव धरणामध्ये मागील 24 तासात 117 मिमी पावसाची नोंद झाली असून यंदाच्या मोसमामध्ये आजपर्यंत 1962 मिमी पाऊस झाला आहे. धरणाच्या पाणी पातळीमध्ये 10.60 टीएमसी इतकी वाढ झाली असून धरण 82.71 टक्के भरले आहे.

टेमघर धरण पाणलोटक्षेत्रामध्ये मागील 24 तासामध्ये 123 मिमी पाऊस झाला असून यंदाच्या मोसमात आजपर्यंत एकूण 2755 मिमी पावसाची नोंद झाली आहे. धरणाच्या पाणी पातळीमध्ये 2.71 टक्के इतकी वाढ झाली असून धरण 73.19 टक्के भरले आहे.

चारही धरणात सरासरी 88.72 टक्के पाणीसाठा निर्माण झाला असून 26.86 टीएमसीने पाणीसाठा वाढला आहे. मागील वर्षी याच दिवशी चारही धरणे सरासरी 86.67 टक्के भरली होती.