Pune News: आरोग्य विभागातील 199 कर्मचाऱ्यांना मुदतवाढ

एमपीसी न्यूज: कोविडच्या संभाव्य तिसर्या लाटेची तयारी आणि लसीकरणासाठी आरोग्य विभागात कंत्राटी पद्धतीने कार्यरत असणाऱ्या कर्मचाऱ्यांना तीन महिन्यांची मुदतवाढ देण्यास स्थायी समितीने मान्यता दिल्याची माहिती अध्यक्ष हेमंत रासने यांनी आज पत्रकार परिषदेत दिली.

रासने म्हणाले, फीजिशियन, अतिदक्षता विभाग फीजिशियन, वैद्यकीय अधिकारी, स्टाफ नर्स, प्रयोगशाळा तंत्रज्ञ, प्रयोगशाळा सहायक अशा 199 कर्मचार्यांना मुदत वाढ देण्यात आली आहे. या आधी 211 कर्मचाऱ्यांना मुदतवाढ देण्यात आली होती. रासने पुढे म्हणाले, आरोग्य विभागात वर्ग एक ते चारच्या 1178 पदांना मान्यता आहे. परंतु सध्या 823 कर्मचारी कार्यरत असून 855 पदे रिक्त आहेत. राज्य सरकारच्या मान्यतेनंतर ही पदे भरता येतील.

प्राणी संग्रहालयातील कर्मचाऱ्यांना सहा महिने मुदतवाढ

महापालिकेच्या कात्रज येथील राजीव गांधी प्राणीसंग्रहालय आणि वन्यजीव संशोधन केंद्रातील पशुवैद्यकीय अधिकारी आणि पशुधन पर्यवेक्षकांना स्थायी समितीने सहा महिन्यांची मुदतवाढ देण्यात आली आहे. ही पदे कायमस्वरुपी भरायची आहेत. त्यासाठी राज्य सरकारकडे प्रस्ताव पाठविण्यात आला आहे. त्याला मान्यता मिळाल्यानंतर पद भरतीची कार्यवाही होईल, अशी माहिती स्थायी समितीचे अध्यक्ष हेमंत रासने यांनी पत्रकार परिषदेत दिली.