Pimpri News : नेहरूकप हॉकी स्पर्धेत एसएनबीपी इंटरनॅशनल स्कूलचा संघ विजयी
एमपीसी न्यूज – पिंपरी – चिंचवड महापालिका आणि जिल्हा परिषद यांच्या संयुक्त विद्यमाने आयोजित केलेल्या जिल्हास्तरीय शालेय ज्युनियर व सबज्युनियर नेहरूकप हॉकी स्पर्धेत 17 वर्षांखालील मुली (ज्युनियर) गटात एस एन बी पी इंटरनॅशनल स्कूल मोरवाडी या संघाने अंतिम सामन्यात विजय मिळवत बालेवाडी येथे होणाऱ्या विभागीय स्पर्धेसाठी पात्र ठरले.
8 ते10 ऑगस्ट दरम्यान महापालिकेच्या मेजर ध्यानचंद पॉलीग्रास हॉकी स्टेडीयम या ठिकाणी जिल्हास्तरीय हॉकी स्पर्धेचे आयोजन करण्यात आले होते.या तीन दिवसीय स्पर्धेचे उद्घाटन उप आयुक्त विठ्ठल जोशी यांच्या हस्ते करण्यात आले होते.स्पर्धेच्या शेवटच्या दिवशी अंतिम सामन्यात एसएनबीपी इंटरनॅशनल स्कूल विरुध्द न्यू मिलेनियम हायस्कूल समर्थनगर संघ यांच्यात अंतिम लढत झाली. एसएनबीपी इंटरनॅशनल स्कूलच्या ज्ञानेश्वरी नरवडेने तिसऱ्या मिनिटाला गोल करत आपल्या संघाचे खाते उघडले. तर, शायना मुलाणी या खेळाडूने 9 व्या आणि 20 व्या मिनीटाला गोल करत विरोधी संघावर आघाडी मिळवली.
इशा लवटे हीने 17 व्या मिनिटाला गोल करत तिसरा गोल संघाच्या नावावर केला.अंतिम सामन्यात प्रतिस्पर्धी असलेल्या न्यू मिलेनियम हायस्कूल समर्थनगर संघाला एकही गोल करता आला नाही.त्यामुळे ही लढत 4 – 0 अशी एकतर्फी झाली.एसएनबीपी इंटरनॅशनल स्कूल संघ बालेवाडी येथे होणा-या विभागीय स्पर्धेसाठी पात्र ठरला आहे.15 आणि 17 वर्षाखालील वयोगटामधील मुले मुली यांच्या जिल्हास्तरीय हॉकी स्पर्धेमध्ये एकूण 23 संघांचा सहभाग होता. तर, 361 खेळाडूंनी सहभागी झाले होते.9 ऑगस्ट रोजी15 वर्षाखालील मुलांच्या गटामध्ये झालेल्या स्पर्धेतील अंतिम सामन्यात सेंट ज्युड हायस्कूल देहूरोड या संघाने विजय मिळवला.
