Deepak Kesarkar : कौशल्य विकासासाठी आवश्यक सुविधा देणार : दीपक केसरकर
केसरकर (Deepak Kesarkar) म्हणाले, “विद्यार्थ्यांचा शारीरिक आणि मानसिक विकास महत्त्वाचा आहे. त्यासाठी शारीरिक शिक्षण या विषयासाठी सुरुवातीच्या काळात चार ते पाच शाळांमध्ये किमान एक शिक्षक देणे शासनाच्या विचाराधीन आहे. विद्यार्थ्यांना मानसिक स्वास्थ्याबरोबर एकाग्रता साधता यावी यासाठी योगाचे विविध प्रकार शिकविण्याची योजना आहे. तसेच आधुनिक तंत्रशिक्षणाबरोबर संगीत, गायन याचे शिक्षण देण्याचा प्रयत्न आहे. त्यासाठी या क्षेत्रांतील नामवंतांचे विद्यार्थ्यांना मार्गदर्शन मिळणार आहे.”
केसरकर (Deepak Kesarkar) पुढे म्हणाले, “नवीन शैक्षणिक धोरण राबविण्यासाठी आवश्यक साधने पुढील शैक्षणिक वर्षापर्यंत शाळांमध्ये उपलब्ध होतील. इयत्ता तिसरीपासून परीक्षा घेता येईल का? याबाबत तज्ज्ञांशी चर्चा सुरू आहे. गृहपाठ स्वयंस्फूर्तिने करायचा अभ्यास आहे. शिक्षकांनी विद्यार्थ्यांना गृहपाठाची किंवा खासगी क्लासची गरज भासू नये असे शिक्षण द्यावे. ई-लर्निंग सुविधा राज्यभर पुरविण्यासाठी सरकार प्रयत्नशील आहे. यासाठी वापरण्यास सुलभ सॉफ्टवेअर विकसित करण्यात येत आहे. भविष्यकाळात शालेय स्तरावर शिक्षण आणि क्रीडा हे दोन्ही विषय सोबत असतील.”