Maval NCP News : मावळ तालुका राष्ट्रवादी काँग्रेसच्या अध्यक्षपदी गणेश खांडगे

कोण आहेत गणेश खांडगे?

मावळ तालुक्याच्या राजकारणात गणेश खांडगे यांचे दिवंगत आजोबा मामासाहेब खांडगे यांचा ‘सक्रिय’ सहभाग होता . मामासाहेब खांडगे पुणे जिल्हा लोकल बोर्डावर सदस्य म्हणून मावळचे प्रतिनिधीत्व करत होते. गणेश खांडगे यांचे वडील वसंतराव खांडगे यांनीही तळेगाव दाभाडे नगरपरिषदेमध्ये ‘नगरसेवक’ म्हणून काँग्रेस पक्षाचे प्रतिनिधीत्व केलेले आहे. आजोबा व वडील यांच्या विचारांचा वारसा जपत गणेश खांडगे गेली 30 वर्ष राजकारणात सक्रिय सहभागी आहे. ज्येष्ठ नेते शरद पवार यांच्या विचारांची प्रेरणा घेवून सार्वजानिक जीवनात काम करीत आहेत.

गणेश खांडगे यांच्या प्रयत्नाने तळेगाव दाभाडे येथे मामासाहेब खांडगे नागरी सहकारी पतसंस्था 1996 मध्ये सुरू झाली. गेली 25 वर्षे ते या पतसंस्थेच्या अध्यक्षपदाची जबाबदारी सक्षमपणे संभाळत आहे. पतसंस्थेस अनेक जिल्हास्तरीय व राज्यस्तरीय पुरस्कार प्राप्त झालेले आहेत. पतसस्थेचे व्यवस्थापन व संचालन उत्तम असल्यामुळे खांडगे यांना पुणे जिल्हा नागरी सहकारी पतसंस्था फेडरेशन तसेच महाराष्ट्र राज्य नागरी सहकारी पतसंस्था फेडरेशनवरही संचालक म्हणून काम करण्याची संधी प्राप्त झाली.

राष्ट्रवादी काँग्रेस पक्षाच्या स्थापनेपासून निष्ठावान कार्यकर्ता म्हणून पक्षाच्या कामात मोलाचा सहभाग आहे. खांडगे यांचे संघटन कौशल्य विचारात घेऊन पक्षाने त्यांच्यावर मावळ तालुका राष्ट्रवादी युवक काँग्रेसच्या अध्यक्षपदाची जबाबदारी सोपवली होती. सात वर्षांच्या अध्यक्षपदाच्या कार्यकाळात त्यांनी केलेल्या कामामुळे गाव पातळीवर राष्ट्रवादी युवक काँग्रेसच्या कार्यकर्त्याची मजबूत फळी सध्याही कार्यरत आहे .

गणेश खांडगे यांच्याकडे सध्या पुणे जिल्हा राष्ट्रवादी काँग्रेसच्या वरिष्ठ उपाध्यक्षपदाची जबाबदारी आहे. तळेगाव दाभाडे येथील ‘राष्ट्रीय शिक्षण’ देण्या-या नूतन महाराष्ट्र विद्या प्रसारक मंडळ या ऐतिहासिक संस्थेच्या उपाध्यक्षपदाची धुरा त्यांनी सांभाळली आहे. याच परिसरात माझ्या कुटुंबीयांच्या माध्यमातून मामासाहेब खांडगे इंग्लिश मीडियम स्कूलची उभारणी करण्यात आली. या भव्य वास्तूचे उद्घाटन शरद पवार यांच्या हस्ते झाले होते. तळेगाव दाभाडे येथे इंद्रायणी विद्या मंदिर या नामवत शिक्षण संस्थेच्या नियामक मंडळाचा संचालक म्हणून कामाचा त्यांना अनुभव आहे.

तळेगाव जनरल हॉस्पिटल अँण्ड कॉन्व्हलसंट होम या आरोग्यसेवा क्षेत्रात काम करणाऱ्या मोठ्या संस्थेच्या  नियामक मंडळाचा ते उपाध्यक्ष आहे . तळेगाव दाभाडे नगरपरिषेदेवर विद्यमान नगरसेवक असून यापूर्वी उपनगराध्यक्ष, पक्षनेता व विरोधी पक्षनेता म्हणून काम करण्याची संधी त्यांना मिळाली आहे. नगरपरिषदेच्या शिक्षण मंडळाच्या सभापतीपदाची धुराही त्यांनी सांभाळली आहे. त्यांच्या पत्नी अनुपमा खांडगे श्री संत तुकाराम सहकारी कारखान्याच्या संचालक म्हणून काम पाहतात.

त्रिदल या संस्थेच्या माध्यमातून त्यांनी विविध सामाजिक उपक्रम राबविले आहेत. तालुक्यात प्रतिष्ठेचा मानला जाणारा मावळ भूषण हा पुरस्कार देऊन त्यांनी तालुक्याच्या  सर्वांगीण विकासात योगदान देणाऱ्या व्यक्तींचा गौरव करण्याची परंपरा त्यांनी सुरू केली.