Pimpri News: खूशखबर! शहरातील झोपडीधारकांना पुनर्वसनात यापुढे 300 चौरस फुटांचे घर;उपमुख्यमंत्री अजित पवार यांनी घेतला निर्णय, राष्ट्रवादीचे शहराध्यक्ष अजित गव्हाणे यांची माहिती

याबाबतची माहिती देताना राष्ट्रवादीचे शहराध्यक्ष अजित गव्हाणे म्हणाले, मुंबईत झोपडीधारकांना 300 चौरस फुटांची घरे देण्याची तरतूद करण्यात आली. त्याची अंमलबजावणीही सुरु आहे. पण, पुणे, पिंपरी-चिंचवड शहरात झोपडपट्टी पुनर्वसन योजनेत पात्र झोपडीधारकांना 225  चौरस फूट क्षेत्रफळाची घरे देण्यात येत होती. नागरिकांकडून झोपडपट्टी पुनर्वसन प्राधिकरण पुणे यांच्याअंतर्गत सुरु असलेल्या नवीन प्रस्तावांमध्ये  300 चौरस फुट चटई क्षेत्रफळाची निवासी सदनिका मिळावी, अशी सातत्याने  मागणी होत होती. त्याबाबत उपमुख्यमंत्री अजित पवार यांच्याकडे आम्ही मागणी केली. त्यानुसार अजितदादांनी नगरविकास, गृहनिर्माण विभागाशी चर्चा केली.

त्यासाठी झोपडपट्टी पुनर्वसन प्राधिकरण यांनी विकास नियंत्रण नियमावलीत फेरबल करण्यासाठी महाराष्ट्र प्रादेशिक नियोजन व नगर रचना अधिनियम 1966 चे कलम 37 (1) अन्वये आवश्यक ती वैधानिक कार्यवाही पूर्ण करुन प्रस्ताव  मंजुरीसाठी पाठविण्याची सूचना शासनाचे अवर सचिव किशोर गोखले यांनी गृहनिर्माण विभागाला दिल्या आहेत. त्याबाबतचा आदेश मंगळवारी पारित केला. त्यामुळे पुणे, पिंपरी-चिंचवड शहरातील झोपडीधारकांना वाढीव 300 चौरस फुटांची घरे मिळण्याचा मार्ग मोकळा झाला आहे. वाढीव सदनिका मिळणार असल्याने पुणे, पिंपरी-चिंचवड शहरातील नागरिकांना मोठा दिलासा मिळणार आहे.  राज्य शासनाने या आदेशाची प्रत पुणे, पिंपरी-चिंचवड महापालिका आयुक्तांनाही पाठविली असल्याचे गव्हाणे यांनी सांगितले.