Pune News : पत्नी अन् सासरच्या त्रासाला कंटाळून लष्करी जवानाची आत्महत्या
एमपीसी न्यूज : पत्नी आणि सासरच्या मंडळीकडून होणाऱ्या त्रासाला कंटाळून भारतीय सैन्य दलात नर्सिंग असिस्टंट म्हणून काम करणाऱ्या 24 वर्षीय जवानाने आत्महत्या केली.
आत्महत्या करण्यापुर्वी त्याने एक व्हिडीओ तयार करून ठेवला असून, सुसाईड नोट देखील लिहून ठेवली आहे. पोलीसांनी पत्नीसह इतरांवर गुन्हा दाखल केला आहे.
गोरख नानाभाऊ शेलार (वय 24, रा. वानवडी) असे आत्महत्या केलेल्या जवानाचे नाव आहे. याप्रकरणी पत्नी अश्विनी युवराज पाटील, युवराज पाटील, संगिता युवराज पाटील, योगेश पाटील, भाग्यश्री पाटील (सर्व रा. शहादा, जि. नंदूरबार) यांच्यावर वानवडी पोलीस ठाण्यात गुन्हा दाखल करण्यात आला आहे. याबाबत केशव पाटील (शेलार) यांनी तक्रार दिली आहे.
याप्रकरणी अधिक माहिती अशी की, गोरख हा भारतीय सेना दलात भरती नर्सींग असीस्टन्ट म्हणून नोकरीस होता. तो ट्रेनिंगसाठी काही दिवसांपुर्वी वानवडीतील ए.एफ.एम.सी सैनिक आवास येथे आला होता. दरम्यान, त्याचा व अश्विनी यांचा गेल्याच वर्षी विवाह झाला होता. अश्विनी या गर्भवती होत्या. दरम्यान, पत्नी आणि सासरचे मंडळी गोरख याला त्रास देत होते. त्याला नोकरी घालविण्याची तसेच गर्भपात करू व तुझ्यावर आणि तुझ्या कुटूंबावर गुन्हा दाखल करू अशी धमकी देत होते. तर, सोडचिठ्ठी दे आणि 15 लाख रुपये दे असे म्हणून त्याला त्रास दिला जात होता.
या सततच्या मानसिक व शारिरीक छळाला कंटाळून त्याने तीन दिवसांपुर्वी (दि. 6 फेब्रुवारी) ट्रेनिंगसेंटर परिसरात तो राहत असलेल्या खोलीत गळफास लावून आत्महत्या केली. आत्महत्या करण्यापुर्वी त्याने सुसाईड नोट लिहीली आहे. तसेच, त्याने मोबाईल मध्ये पत्नी व सासरच्यांकडून होणाऱ्या त्रासाचा व्हिडीओ देखील शुट करून ठेवला होता. पोलीसांकडून हे सर्व जप्त करण्यात आले आहे. त्याचा तपास सुरू असून, अद्याप कोणाला अटक करण्यात आलेली नाही. अधिक तपास वानवडी पोलीस करत आहेत.
